Parroquia adscrita a Santa María de Seteventos e pertencente ao arciprestazgo do Saviñao. En 1991 tiña 148 habitantes agrupados nas entidades de Carballo, Cruz, Igrexa, Lama, Outeiro e Pedrouzos, sendo a densidade media / entidade, para o mesmo ano, de 21,4 hab./Km2. Os primeiros datos documentais referentes a esta parroquia remóntanse ao ano 976, no que se recolle unha importante doazón, que incluía a súa igrexa. Dentro da parroquia hai varios xacementos arqueolóxicos que datan do período megalítico e un castro, alongado, cuxas dimensións máximas corresponden a 100 * 70 metros.